İtaliyada insanlar pulsuz üzgüçülük hüququnun götürülməsinə qarşı mübarizə aparırlar.
Hafta.az-ın “The Guardian”a istinadən yazdığına görə, İtaliya çimərliklərinin çoxu “özəl klubları olan və ya çətir və şezlonglar üçün böyük pul alan ailə bizneslərinin əlindədir”.
İtaliyada Azad Dəniz (Mare Libero) hərəkatının öncüllərindən olan Manuela Salvi deyir: “İtalyanların əksəriyyəti çimərliyə pulsuz getmək hüququnun olduğunu bilmir. Çimərliyə getmək üçün pul verməyə öyrəşiblər. Əgər səsimizi eşitməsək, qurumlar bizə əhəmiyyət vermədiyini düşünəcəklər”.
Fəal Marqerita Uelyam özəl çimərliklərdə qiymətlərin nəzarətdən çıxdığını bildirir və bunları deyir: “Çimərliklərin daha çox özəlləşdirildiyi ərazilərdə insanlar üzgüçülüyün yeganə yolunun onlardan istifadə olduğuna inanırlar və bu, çox bahalaşıb. Anam üç ay müddətinə eyni kabinəni, günəş şezlonunu və çətiri icarəyə götürmək üçün təxminən 3 min avro ödədi”.
“The Guardian” yazır ki, bəzi çimərliklərdə iki şezlong və çətir üçün gündə orta hesabla 30-35 avro tələb olunduğu halda, daha eksklüziv yerlərdə qiymətlər 700 avroya qədər qalxır. Bu aralıqlarda qiymət təklif edən ən azı 12 min obyekt və klub var.
İtaliyada dövlətə məxsus çimərlik imtiyazlarının avtomatik olaraq çimərlik operatorlarının ailələrinə verildiyi bu sistem uzun müddətdir ki, Avropa Komissiyası tərəfindən tənqid edilir. Bu sistem konsessionerlərin yeni operatorlarla rəqabət aparmalı olduğunu bildirən Avropa İttifaqının (Aİ) qanunlarına uyğun olaraq qeyri-qanuni təcrübədir.
Apreldə İtaliya Ali Məhkəməsinin qərarı ilə çimərlik imtiyazlarının avtomatik yenilənməsi dayandırılıb. Bununla əlaqədar, İtaliyadakı 7900 kilometrlik sahil xəttinin demək olar ki, yarısına uyğun gələn bu güzəştlər üçün gələn ildən etibarən dövlət tenderləri başlayacaq.
Lakin fəallar bu qərardan razı olsalar da, sabahdan ailə biznesi sahibləri tətil edəcək.
Bu müəssisələrin hüquqlarını müdafiə edən İtaliya Çimərlik Konsessiyaçıları Assosiasiyasının bəyanatında aşağıdakı ifadələr yer alıb: “Müəssisələrin bağlanması və işçilərin işsiz qalması kimi ciddi risk var. Bizə dövlət dəstəyi lazımdır və dərhal verilməsə, heç bir faydası olmayacaq”.
Operatorlar tələblərinə cavab verilməyəcəyi təqdirdə avqustun 19 və 29-da yenidən tətil edəcəklərini bildirirlər.
Keçən il 32 milyon xarici turistin ziyarət etdiyi Yunanıstanda ekoloqların “Çimərliklər xalqındır, xalqın olaraq qalacaq” şüarı ilə başlatdıqları dəsmal hərəkəti ilə çimərliklərin özəlləşdirilməsinə etirazlar gündəmə gəlib.
Sürətlə böyüyən hərəkat Türkiyəyə də yayılıb, Datça, Çeşmə və Ayvalık kimi sahil bölgələrində yürüşlər və oturaq etirazlar təşkil edilib.
